IJTIMOIY TARMOQLARDAGI TURLI MAVZUDAGI KONTENTLARNING PEDAGOGIK, PSIXOLOGIK VA AXLOQIY TA’SIRINI BAHOLASHDAGI MUAMMOLAR

Bugungi raqamli jamiyat sharoitida ijtimoiy tarmoqlar insonlarning axborot olish, muloqot qilish, ta’lim olish, o‘z fikrini ifoda etish va ijtimoiy munosabatlarga kirishish jarayonining ajralmas qismiga aylanib bormoqda. Ayniqsa, yoshlar va o‘smirlarning kundalik hayotida ijtimoiy tarmoqlar muhim axborot-kommunikatsiya muhiti sifatida namoyon bo‘lib, ularning dunyoqarashi, qadriyatlari, xulq-atvori va ijtimoiy faolligiga muayyan darajada ta’sir ko‘rsatmoqda. Shu nuqtai nazardan, ijtimoiy tarmoqlarda tarqatilayotgan turli mazmundagi kontentlarning shaxs kamolotiga ta’sirini pedagogik, psixologik va axloqiy jihatdan baholash dolzarb ilmiy-pedagogik muammolardan biri hisoblanadi. Ijtimoiy tarmoqlardagi kontent tushunchasi keng ma’noga ega bo‘lib, unga ta’limiy, ilmiy, madaniy, ko‘ngilochar, siyosiy, ijtimoiy, reklama, blogerlik, shaxsiy va boshqa turdagi materiallar kiradi. Ularning har biri foydalanuvchiga turlicha ta’sir ko‘rsatishi mumkin.